香港之苦－地獄門

無論是否想買樓的人，聽到『真揼首』最新有關樓價的言論都會想揼佢一身又或者抓爆頭點解呢條友會做到特區首長。大佬呀，樓價高咁就梗係驚再高買唔起，於是更加一咼蜂去買；樓價低又驚變負資產。而且樓價低多數經濟唔多好，有錢都留來傍身啦！唔驚失業或裁員咩！要你政府幫，又話搞到你好難做！係你自己話做好呢份工，咁難做，拜托你唔好做，返屋企休息下。如果個個好似羅傑斯咁勁咁清楚市場動態，就唔使你幫。白高敦都係不知情下先私下討論工黨女選民，曾特首公開發表全港6佰幾萬市民(扣除100萬有樓有錢的港人)搞到佢好難做。白高敦最後都自動請辭，曾特首唔該唔好咁厚面皮留係度霸住個位，下邊大把人爭住做。

一畢業就買樓
首先，要籌/儲錢俾首期。一個剛畢業的學生…可能連大耳窿都未必肯借錢俾個畢業生做首期。儲得黎又話要結婚生仔，咁結婚後工作幾年先買到樓好合理。一畢業就話買樓，籌備都要時間架！『真揼首』話自己結婚後工作幾年先買樓，唔通今晚講，聽日d錢就會係佢個肚生出黎？會生金蛋的鴨子？！！

第二，一畢業就話買樓，都係計劃下將來。連諗都唔俾人諗，諗下都俾人仲話一畢業就要買樓。唔好話言論自由，港人連思想自由都無。諗下、講下想要一個安樂窩都要俾你串，真係『香港之苦』。貧富不均、樓價高企係很多國家面對的問題。但都係第一次見到一個地方首長公開發晦氣，佢好似講緊：『你班蟻民，天堂有路你不走，地獄無門闖進來！你地自己攞黎，總之唔好搞到我！』

『先天下憂而憂，後天下之樂而樂』的看來只係范仲淹寫出黎安慰下世人。可能現實中，無領袖會咁諗。又或要等到我腦栓塞果日先明曾特首究竟諗緊乜、講緊乜！


提外話，個人認為最浪費公帑的應該係出糧俾『真揼首』…其他的都講唔上係浪費！